സംഭാണിയും ഗ്രഗേറ്റ്സും വാറനും ..പിന്നെ ഞാനും

സ്വപ്നം കാണുമ്പോള്‍ എന്തിനാ കുറയ്ക്കുന്നത് .... ഈ ഫണ്ട ഉള്ള കാരണം നമ്മള്‍ ഈ സംഭവത്തില്‍ ഒട്ടും പിശുക്ക് കാണിക്കാറില്ല .

രാവിലെ ആപ്പീസില്‍ എത്തിയപ്പോള്‍ കൂടെ ജോലി ചെയ്യുന്ന ആള്‍ ചോദിച്ചു " ഇന്നലെ കണ്ടില്ലല്ലോ ...എവിടെ ആയിരുന്നു ?

ഉടന്‍ മറുപടി കൊടുത്തു " ഒരു ബിസിനെസ്സ് മീറ്റിംഗ് ഉണ്ടായിരുന്നു ".

" ആരുടെ കൂടെ ?"

ഞെട്ടിക്കുന്ന മറുപടി കൊടുത്തു " വാറന്‍ (ബഫ്ഫെ) , മുകേഷ് (സംഭാണി) , പിന്നെ ബില്‍ ഗ്രഗേറ്റ്സ് "

ചോദ്യം ചോദിച്ചവന്‍ മുതുകാടിന്റെ മാജിക് പോലെ അപ്രത്യക്ഷനായി.

ഇനി ഒരു സത്യം പറയാം..ആരോടും പറയരുത് ...ഇന്നലെ രാത്രി ഇവരെല്ലാം എന്റെ സ്വപ്നത്തില്‍ ഉണ്ടായിരുന്നു .... റീവൈന്‍റ്.... സ്ഥലം ...സമയം കഥാപാത്രങ്ങള്‍ എല്ലാം റിയലി ഒറിജിനല്‍ ....

സ്ഥലം പാലക്കാട്ടെ തെറ്റില്ലാത്ത ഒരു ഹോട്ടലായ അശോക്‌ ഭവന്‍ ... ആതിഥെയന്‍ ഈ ഉള്ളവന്‍ ...സമയം നല്ല ഒരു തിങ്കളാഴ്ച  രാവിലെ 9 .55 ,... റോഡ്‌ ഫേസ് ചെയ്യുന്ന ഏറ്റവും നല്ല ടേബിള്‍ ആണ് ഞാന്‍ ബുക്ക്‌ ചെയ്തിരുന്നത് ( ഞെട്ടണ്ട .. പരിപാടി വളരെ സിമ്പിള്‍ ... കയ്യൂക്കുള്ളവന്‍ കാര്യക്കാരന്‍ ..ഏറ്റവും നല്ല ടേബിള്‍ ചുമ്മാ കയ്യടക്കുക. ഒരു രണ്ടു  പ്ലാസ്റ്റിക്‌  സഞ്ചികള്‍  എതിരെ  ഉള്ള   കസേരകളില്‍  വയ്ക്കുക .. അഥവാ  അല്പം  ധൈര്യം ഉള്ള ആരെങ്കിലും ഇരിക്കാന്‍ ശ്രമിച്ചാല്‍ ‍  "ആളുണ്ട് , കൈ കഴുകാന്‍ പോയി" എന്ന് തട്ടിവിടുക.)

 അതാ  ഒരു  ഓട്ടോ   വന്നുമ്മറത്തു   തന്നെ   നിന്നു.    ആരാ   ഇറങ്ങിയത്   ..  മുടി   അല്പം  നരച്ചെങ്കിലും  ചിന്തകളിലും  ചടുലതയിലും   യുവത്വം  തുളുമ്പുന്ന  ബഫ്ഫെ ...  പുള്ളി  നേരെ  ഉള്ളിലോട്ടു   കയറി  നമ്മുടെ  അടുത്ത്  തന്നെ  വന്നു. ഞാന്‍  എണീറ്റ്‌   അദ്ദേഹത്തിനെ   സ്വീകരിച്ച്  ഇരുത്തി ...  

പച്ച   മലയാളത്തില്‍  അദ്ദേഹത്തിന്റെ    ആദ്യ      ചോദ്യം  "ഗ്രേഗേറ്റ്സും    സംഭാണീം   എവിടെ ?"  ...

ചോദിച്ചു നാക്ക് അകത്തിടും മുമ്പ് അതാ മറ്റൊരു ഓട്ടോയില്‍  നിന്നും  സാക്ഷാല്‍  ഗ്രേഗേറ്റ്സും   സംഭാണീം  ഇറങ്ങി  ...  ഓട്ടോക്കാരന്റെ  കയ്യില്‍  നിന്നും  ഒന്നര  രൂപ  ചില്ലറ  തിരിച്ചു  വാങ്ങിയ  ശേഷം  രണ്ടു  പേരും  കൃത്യമായി  ഞങ്ങളുടെ  അടുത്തെത്തി.  നിറഞ്ഞ  ചിരിയുമായി  ഞങ്ങള്‍  രണ്ടു  പേരും അവരെ സ്വീകരിച്ചിരുത്തി.. 

ഓര്‍ഡര്‍ എടുക്കാന്‍ തലപ്പാവ് വെച്ച ഒരു വെയിറ്റര്‍ ഓടി എത്തി...  നാല്   പൊറോട്ട  പോരട്ടെ ..  ഓര്‍ഡര്‍  കൊടുക്കാന്‍  സംഭാണി  ഒട്ടും  വൈകിച്ചില്ല...  ചുമ്മാതല്ല  പുള്ളിയുടെ  എല്ലാ പരിപാടികളും  കൃത്യ  സമയത്ത്  നടക്കുന്നത് ...

ഞങ്ങള്‍ ചര്‍ച്ച തുടങ്ങി ... വിഷയം കേരളത്തില്‍ ഒരുഗ്രന്‍ സെറ്റപ്പ്  ഉണ്ടാക്കുക  ... 500  ഏക്കറില്‍  ഒരു കോമ്പ്ലെക്സ് ..    നെടുമ്പാശ്ശേരി   വിമാന  താവളത്തിന്റെ  അടുത്ത്  തന്നെ .. വെറും  50  നിലയില്‍  ഒരു  തുടക്കം ...  രണ്ടു കൊല്ലം കഴിഞ്ഞ്  200  നിലയുള്ള  ഒരു  കോമ്പ്ലെക്സ്  കൂടി...  സ്ഥലവും  കെട്ടിടവും  നമ്മുടെ  സംഭാണിവക ...

സര്‍വ കമ്പ്യൂട്ടറും സോഫറ്റ്‌വെയറും ബില്ലിന്റെ വക ...ആകെയുള്ള ഡിസൈന്‍ നമ്മുടെ വക...കമ്പനി തുടങ്ങിയ ശേഷം പബ്ലിക്‌ ഇഷ്യുവിന്റെ ചുക്കാന്‍ വാറന്റെ കയ്യില്‍. തല്‍ക്കാലത്തെ  മുടക്കുമുതല്‍  50000 കോടി  ഡോളര്‍.  11  മാസത്തില്‍  നാട  മുറിക്കാന്‍  പറ്റുന്ന അസ്സല്‍  പ്ലാന്‍ ഞാന്‍ അവതരിപ്പിച്ചു ..

ഇതിന്റെ  ഇടയില്‍ എപ്പോഴോ പൊറോട്ട കഴിഞ്ഞതും സംഭാണി നാല് ഉഴുന്ന് വടക്ക് ഓര്‍ഡര്‍ കൊടുത്തതും പ്രത്യേക  പരാമര്‍ശം  അര്‍ഹിക്കുന്നില്ല.  

അല്പം വ്യത്യാസങ്ങളോടെ സംഭാണി എന്റെ  പ്ലാന്‍   അംഗീകരിച്ചു ...  മറ്റു രണ്ടു പേരും കയ്യടിച്ചു...

തലപ്പാവിട്ട ചങ്ങാതിയെ വിളിച്ചു ഞങ്ങള്‍ നാല് ചായക്ക്‌ കൂടി പറഞ്ഞു.. കുറ്റം പറയരുതല്ലോ ...ഇരുപത്തഞ്ചു കൊല്ലം മുമ്പുള്ള സ്പീഡ് ഇവിടുത്തെ  സെര്‍വിസിനു  ഇപ്പോഴും  ഉണ്ട്. രണ്ടു  മിനിറ്റില്‍  ചായ എത്തി.  കുടിച്ചു  കഴിയും  മുമ്പേ  ബില്‍  റെഡി. എട്ടു രൂപ ടിപ് അടക്കം അഞ്ഞൂറിന്റെ ഒരു നോട്ടു മാറിക്കിട്ടി.

കാര്യം എന്തൊക്കെ ആയാലും വാറന് നല്ല മര്യാദ ഉണ്ട് .. നന്ദിപ്രകാശന പ്രസംഗത്തില്‍ പൊറോട്ടയും വടയും ചായയും അസ്സലായി എന്ന് പറയാന്‍ യാതൊരു മടിയും അദ്ദേഹം കാണിച്ചില്ല... സംഭാണി   ഉത്സാഹത്തോടെ കയ്യടിച്ച് സംഭവം ശരി വച്ചു .  ഒന്നും  പിടി  കിട്ടാതെ  ബില്‍  മാത്രം  വായും  പൊളിച്ചിരുന്നു .  

അടുത്ത മീറ്റിംഗ് കൊച്ചിയിലെ വാറന്റെ  ആപ്പീസില്‍  വച്ചടുത്ത  ആഴ്ച സമയം  തീരുമാനിച്ച ശേഷം  സംഭാണി   ഐശ്വര്യമായി  ആദ്യത്തെ  അഡ്വാന്‍സ്‌  ആയ  1000 കോടി  ഡോളര്‍ ‍ എനിക്ക്  കൈമാറി. 

 എവിടെ ...ഈ നെറ്റ് യുഗത്തിലാണോ കാഷ്.. ഛെ  ഛെ മോശം ..  സ്വന്തം  പാംടോപ്‌  എടുത്തിട്ട്  ചില  ബട്ടണുകള്‍  അങ്ങോട്ട്‌ ഞെക്കി  സംഭാണി    ..ഒരു  മിനുട്ട്  കഴിഞ്ഞപ്പോള്‍  എന്റെ  മൊബൈലില്‍  അതാ  വരുന്നു  ബാങ്കിന്റെ  sms . താങ്കളുടെ അക്കവുണ്ടില്‍    1000 കോടി  ഡോളര്‍ ഡിപ്പോസിറ്റ്  ആയിരിക്കുന്നു.

കൃഷ്ണാ.സര്‍വവും മംഗളമയമായി ഭവിക്കേണമേ  എന്നെല്ലാം  പ്രാര്തിക്കുന്നതിന്റെ  ഇടക്കതാ  ഒരു  മൊബൈലിന്റെ  അലാറം  അടിക്കുന്നു.  ഇതേതട  ശല്യം  എന്ന്  വിചാരിച്ച്  കൈ  നീട്ടി  അത് നിറുത്താന്‍ നോക്കി.  ഏഹെ നടന്നില്ല ..പെട്ടെന്ന് തിരിഞ്ഞു ഒരു കളരി  സ്റ്റൈലില്‍  മുന്നേറി  ..ഫലം ഉണ്ടായി.  പധോം ..അയ്യോ ..ചെറിയ  ഒരു  വേദന ... കണ്ണ്  തുറന്നപ്പോള്‍  ഫാനിലോട്ടു  നോക്കി  കട്ടിലിന്റെ  താഴെ  അത്ര   വലിയ  പരുക്കൊന്നും  പറ്റാതെ  ഞാന്‍  കിടക്കുന്നു.  ആരെങ്കിലും  വരുന്നതിനു  മുമ്പ്  തന്നെ  പെട്ടെന്ന്  ചാടി  എണീറ്റു.  നല്ല  ഒരു  സ്വപ്നം  മുറിഞ്ഞതിന്റെ  നഷ്ടബോധവും  ആയി  പല്ല്  തേക്കാന്‍ ഞാന്‍  നടന്നു  നീങ്ങി.